पालखी मुक्कामाच्या ठिकाणासह पंढरपूरात मद्य विक्रीस मनाई

सोलापूर दि.23 :- आषाढी यात्रा पार्श्वभूमीवर पंढरपूर शहरात व पालखी मुक्कामाच्या ठिकाणी शांतता व कायदा सुव्यवस्था अबाधित रहावी यासाठी जिल्हाधिकारी डॉ. राजेंद्र भोसले यांनी महाराष्ट्र दारुबंदी अधिनियम 1949 मधील कलम 142 अन्वये प्रदान केलेल्या अधिकारानुसार पंढरपूर शहर व पालखी मुक्कामाच्या ठिकाणाची सर्व मद्य विक्री अनुज्ञप्ती बंद ठेवण्याचे आदेश दिले आहेत.

या आदेशानुसार पंढरपूर शहरात आषाढी एकादिशी निमित्त दिनांक 3 जुलै ते 5 जुलै 2017 या कालावधतीत सर्व मद्य विक्री अनुज्ञप्ती बंद ठेवावीत. तसेच दिनांक 8 ते 9 जुलै 2017 कालावधीत पंढरपूर शहरात सायंकाळी 5 नंतर मद्य विक्री दुकाने बंद ठेवावीत.

संत ज्ञानेश्वर महाराज व संत तुकाराम महाराज पालखी मुक्कामाच्या ठिकाणी दिनांक 28 जून 2017 रोजी- नातेपुते, दिनांक 29 जून 2017 रोजी माळशिरस, अकलूज, दिनांक 30 जून 2017 रोजी वेळापूर, बोरगाव, श्रीपूर, माळीनगर, दिनांक 1 जुलै 2017 रोजी भंडशेगाव, पिराची कुरोली आणि दिनांक 2 जुलै 2017 रोजी वाखरी येथील सर्व मद्य विक्री अनुज्ञप्ती पूर्ण दिवस बंद ठेवण्याचे आदेश देण्यात आले आहेत.

तसेच आषाढी यात्रेच्या अनुषंगाने दिनांक 3 ते 5 जुलै 2017 या कालावधीत पंढरपूर शहरापासून 5 कि.मी. परिसरातील देशी, विदेशी मद्य विक्री परवाना कक्ष अनुज्ञप्ती पूर्ण दिवस आणि दिनांक 8 ते 9 जुलै 2017 कालावधीत सायंकाळी 5 वाजेनंतर बंद ठेवावीत, असेही जिल्हाधिकारी डॉ. भोसले यांनी आदेशात नमूद केले आहे