मंगळवेढ्यातील सचिन कलुबर्मे खूनप्रकरणात पोलीसांनी केली तीन वाहने जप्त.. पुरावा नष्ट केल्याप्रकरणी कलमामधे वाढ!

सचिन कलुबर्मे याचा खून केल्यानंतर आरोपी बाबासाहेब नाईकवाडी हा खोमनाळ नाक्याजवळील एका दुकानाच्या आश्रयाला लपून बसला होता. तदनंतर त्याने आरोपी कराळे याला फोन करून एम.एच.13 सी.के.1769 ही स्विफ्ट कार मागवून घेतली. कराळे व आरोपी नाईकवाडी व त्याची लहान मुले असे गुंजेगाव तन्हाळी मार्गे पंढरपूरातील नातेवाईकांकडे गेले. नातेवाईकांनी नकार दिल्यानंतर ते पुन्हा मंगळवेढ्याकडे माघारी येवून पाठखळ येथे थांबले. यावेळी कराळे यांनी जतकडे स्विफ्ट कार घेवून जाण्यास नकार दिला. तद्नंतर अलीम पटेल याला फोन करून एम.एच.13 ए.झेड.8224 ही बोलोरो जीप मागवून घेतली व आरोपी गुंलगुंजन (ता.जत) येथील आरोपी बाबासाहेब नाईकवाडी याची मावस बहिणीकडे गेले तेथे त्याने रक्ताने माखलेला टी-शर्ट स्वयंपाक खोलीत असलेल्या चुलीत जाळला असल्याचे पोलीस तपासात निष्पन्न झाले. या घटनेत आरोपींना पळून जाण्यास मदत केली व पोलीस प्रशासनास घटनेची माहिती देणे गरजेचे असताना ती माहिती लपवून ठेवल्याप्रकरणी धनाजी कराळे वय 33 वर्षे व अलीम पटेल यांना पोलीसांनी अटक केली.व गुन्ह्यात वापरलेले स्विफ्ट कार तसेच बोलेरो जीप, आरोपींनी खून करण्यापूर्वी घटनास्थळी येताना एम.एच.13 सीजी.0801 ह्या फॅशन मोटारसायकलाचा वापर केल्याने एकंदरीत पोलीसांनी तीन वाहने या घटनेत जप्त केली आहेत. आरोपी बाबासाहेब नाईकवाडी यांच्याकडे पोलीस कोठडीत कसून चौकशी केली असता सचिन कलुबर्मे याचा खून करताना वापरलेले हत्यार एका पडक्या घरात लपवून ठेवल्याचे सांगितले. पोलीसांनी आरोपीला घटनास्थळी नेल्यानंतर रक्ताचे डाग असलेले हत्यार काढून दिले. या खूनप्रकरणी दोन दिवसात एकूण पंधराजणांकडे कसून चौकशी करण्यात आली. पोलीस अधिक्षक श्री.एस. विरेश प्रभू यांच्या मार्गदर्शनाखाली सहाय्यक पोलीस निरीक्षक श्री.सचिन हुंदळेकर व चार पोलीस कर्मचारी तर दुसर्‍या पथकात पोलीस उपनिरीक्षक श्री.दत्तात्रय पुजारी यांच्यासह चार पोलीस कर्मचारी नेमण्यात आले आहेत. एक पथक गुरूवारी आरोपींच्या शोधासाठी रवाना झाले आहे. लवकरच आरोपींना गजाआड केले जाईल असे पोलीस सूत्रांकडून सांगण्यात आले.